Kung hindi mo pa napapanood ang ilang pelikulang tampok sa 50th Metro Manila Film Festival (MMFF), pwede ka pang humabol hanggang Enero 14, Martes.

Inanunsyo nitong Lunes ng Metropolitan Manila Development Authority (MMDA) na extended ang screening ng MMFF films hanggang sa susunod na linggo. Nauna nang sinabi ng ahensya na bukas, Enero 7, ang huling araw ng film fest.

"We, at the MMFF, are overwhelmed with the continued support of the public for the festival’s 50th edition. Due to public clamor, we have decided to extend the theatrical run of the MMFF movies to further showcase the locally produced films that are truly impressive and artistically excellent," anang MMDA chairman Atty. Don Artes sa isang pahayag.

Maaari pang gamitin ang MMFF complimentary passes hanggang Enero 14, dagdag ng opisyal.

Aniya, umaasa ang MMDA na lalaki pa ang kita ng mga pelikula dahil sa extension.

Naitala ang all-time high gross sales ng film fest noong 49th MFFF sa taong 2023, kung kailan umabot sa P1.069 billion.

Nalagpasan nito ang P1.061 billion na kinita ng MMFF noong 2018.

Bahagi ng kita ng film fest ay napupunta sa Movie Workers Welfare Foundation (Mowelfund), Film Academy of the Philippines, Motion Picture Anti-Film Piracy Council, Optical Media Board, at Film Development Council of the Philippines (FDCP).

Sampu ang piling entries ngayong taon. Ito ay ang ''And The Breadwinner Is,'' ''Espantaho,'' ''Green Bones,'' ''Hold Me Close,'' ''Isang Himala,'' ''My Future You,'' ''Strange Frequencies: Taiwan Killer Hospital,'' ''The Kingdom,'' ''Topakk,'' at ''Uninvited.''