Ayon sa Southeast Asia Tobacco Control Alliance (SEATCA), dapat singilin ng environmental tax ang malalaking kumpanya ng sigarilyo lalo pa't 4.5 trilyong upos ng sigarilyo ang kinokonsumo at itinatapon sa buong mundo kada taon.

Sa nasabing bilang, higit 507 bilyong upos ng sigarilyo ang matatagpuan sa member-states ng Association of Southeast Asian Nations (ASEAN).

"Cigarette butts are the most-littered single-use plastics in the world, and now there is a growing issue of e-waste from e-cigarettes and how these can harm ecosystems and wildlife," ani SEATCA executive director Dr. Ulysses Dorotheo.

"Governments need to implement the polluters pay principle and hold the tobacco industry accountable for the environmental harms of its products. An environmental tax would be a good start," dagdag pa niya.

Maituturing anila na single-use plastic ang mga upos ng yosi dahil mayroon itong cellulose acetate, isang materyal na nagtatagal ng daan-daang taon bago kusang matunaw.

Gumagastos ng higit US$9.9 bilyon ang mga bansa sa ASEAN para i-manage ang polusyon sa tubig na dulot ng tobacco product packaging and mga upos ng yosi, ayon pa sa SEATCA.

Nagbabala rin ang grupo sa lalong pagdami ng electronic waste na idinudulot ng electronic cigarettes o vapes na naglalaman ng lithium batteries, plastic pods, at electric circuit.

May mga nakalalasong kemikal din ito tulad ng residual nicotine, heavy metals, at iba pang carcinogens na nakapipinsala sa lupa at tubig.

Tinatayang 62 milyong ton ng electronic waste ang itinapon ng mundo noong 2022, at maaari itong umabot sa 82 milyong ton sa 2030, ayon sa pag-aaral ng UN International Telecommunications Union and Institute for Training and Research.

"As governments find a long-term solution to stop the plastic pollution, they should ensure their negotiations are not compromised by lobbying from the polluting industries who have a conflict of interest in the negotiations," saad ni Dorotheo.