Mahilig ka ba sa instant pancit canton?

Pasok ang Lucky Me! Pancit Canton Kalamansi flavor sa Best Instant Noodles of 2025 list ng New York Times, na kinabibilangan ng Indomie's Mie Goreng at Nongshim's Neoguri Spicy Seafood.

Sa nasabing listahan, itinanghal ang Lucky Me! Pancit Canton Kalamansi bilang best pick para sa citrusy ramen category sa Wirecutter section ng pahayagan.

"Of all the noodles we’ve tested, the Pancit Canton Kalamansi disappeared from the bowl the fastest," ayon kay Marilyn Ong, supervising editor ng New York Times.

Bagama’t binanggit niyang maliit ang serving, pinuri ni Ong ang variant na ito dahil sa dry seasoning, soy sauce, at oil packets na nagbibigay aniya ng balanseng timpla ng banayad na alat ng toyo at sariwang aroma ng kalamansi.

Inilarawan niya rin ang manipis at "extra-curly" nitong noodles, na nagbibigay ng halos "fluffy" na pakiramdam habang kinakain.

"I definitely called them 'cute' while eating them," ayon sa kanyang paglalarawan.

Nagbabala naman si Ong na maaaring hindi sapat sa tao ang isang pack dahil sa maliit nitong serving.

"Be warned it may take more than a pack to satisfy," ani Ong.

Ayon sa kanya, ang listahan ay binuo ng isang rotating panel ng Wirecutter’s kitchen team, na sumubok ng higit 45 uri ng ramen na inerekomenda ng mga eksperto, kabilang ang mga may-akda ng cookbook at ramen reviewers.

Sinuri ng panel ang hitsura, texture ng noodles, lasa at lapot ng sabaw o sauce, antas ng anghang, at kadalian ng paghahanda.

Kasama sa mga kategorya ang beef noodle soups, seafood flavors, saucy o creamy noodles, spicy, at simple base noodles.

"Ultimately, we picked the highest-quality or most-compelling ones—noodles with the chewy or silky textures they promise, and broths or sauces with a good balance of flavors and that taste surprisingly similar to freshly made versions of the dishes they invoke," ayon kay Ong. #