Patuloy na umaani ng paghanga mula sa PIlipinas at iba pang parte ng mundo si Defense Secretary Gilberto Teodoro Jr. matapos na supalpalin nito ang mga opisyal ng Chinese military ukol sa South China Sea territorial dispute noong Linggo sa Singapore.

Sa panel discussion sa Shangri-La Dialogue, binatuhan ng leading questions ang opisyal ng Pilipinas mula kina Senior Col. Qi Dapeng at Senior Col. Zhang Chi, pawang mga professor sa National Security College at National Defense University sa China.

Ipinagtataka ni Qi kung bakit hindi na lamang sumunod ang Pilipinas sa ehemplo na ipinakita ng mga kapitbansang Malaysia at Vietnam na umanoy nakikipag-diyalogo sa China ukol sa pinagtatalunang mga teritoryo. Sa halip, naging confrontational umano ang Pilipinas.

Si Zhang naman ay nagtanong kay Teodoro kung hindi ito nababahala na magkaroon ng proxy war sa Asya na tulad ng Ukraine at Russia kung saan minamanok ng United States ang Ukraine.

Sa kanyang katanungan, inalam ni Zhang kung ang umanoy pangingialam ng US sa South China Sea dispute ay maaaring magsanhi rin ng ganitong sitwasyon.

Seryosong hinarap ni Teodoro ang mga katanungan na itinuring niyang mga “propaganda spiels disguised as questions.”

“The fact that the question was asked in the way it does, it engenders a deficit of trust in China’s words vis-a-vis its actions,” paliwanag ng DND chief na umani ng palakpakan mula sa mga live audience.

Ayon kay Teodoro hindi naman katulad ng Malaysia ang pagtrato ng China sa Pilipinas.

“I’m sure that if what China is doing to the Philippines is done to Malaysia or to any ASEAN country, you would see a different reaction,” diin nito.

Itinanggi ni Teodoro na ang Pilipinas ay isang “proxy” ng Amerika para sa mga interest nito laban sa China.

“I would like to reiterate that the Philippine posiiton on the West PHilippine Sea is not a function of Sino-American strategic rivalry. Instead, it is caused, no doubt by the overreach of the Chinese,” ayon kay Teodoro.

Inilarawan ng Cabinet official kung paano sinakop ng China ang Panganiban o Mischief Reef na may layong 130 nautical miles sa kanluran ng Palawan at sakop pa ng 200-nautical mile exclusive economic zone ng Pilipinas.

“There were few bamboo structures erected there and China said that these were temporary havens for fisherfolk. Now you have an artificial military island, heavily militarized,” ayon sa kanya.

“China says that it has peaceful intentions. Why dos it continue to deny the Philippines its rightful provenance under international law and UNCLOS (United Nations Convention on the Law of the SEA)?” tanong ni Teodoro.

Sinabi rin niya na maraming mga bansa ang nagpakita ng suporta sa Pilipinas tungkol sa mga teritoryo nito ngunit walang kumampi sa China.

“For dialogue to be effective, it must be coupled with trust, and Cina has a lot of trust-building to do to be an effective negotiating partner in dispute settlement,” diin ng defense chief.