Mariing pinuna ng mga petitioner ng Supreme Court petition GR 274778 (Pimentel et al. vs House of Representatives) ang baluktot na argumento ni Finance Secretary Ralph Recto sa paglilipat ng PhP 89.9 bilyong pondo ng Philippine Health Insurance Corporation (PhilHealth) sa National Treasury. Ayon sa mga petitioner, “nonsensical” ang ipinagmamalaki ni Secretary Recto na “common-sense approach” sa pagkuha ng pondo dahil hindi “common sense” ang lumabag sa batas.

Nilabag umano ng Kongreso at ng ehekutibo, sa pangunguna ni Recto, ang Universal Health Care Act kung saan ipinagbabawal ang paglipat ng anumang pondo ng PhilHealth sa national government. Magkakutsaba rin umano ang dalawang sangay ng gobyerno sa paglabag ng Sin Tax Law na nagsasaad na ang earmarked revenues mula sa mga buwis sa tobacco at sweetened beverages ay ekslusibo para sa PhilHealth.

Pinasinungalingan din ng petitioners ang sinabi ni Sec. Recto na “fiscal responsibility” ang pagkuha ng diumano’y “‘natutulog” na pondo ng PhilHealth.
Diin ng mga petitioiners, “fiscally irresponsible” ang ginawa nina Recto dahil nilabag nila ang mga batas. Dagdag pa, ang sanhi ng “fiscal pressure” ay ang paglipat ng pondo ng regular programs sa budget sa pork barrel programs ng mga pulitiko. At dahil kinapos ang pera para sa regular programs, kinuha ang pondo ng PhilHealth at Philippine Deposit Insurance Corporation (PDIC). "Sa bagay na ito, binaluktot ni Sec. Recto ang katotohanan," ayon sa pahayag ng Social Watch Philippines.


Bukod dito, tila nagbanta pa si Secretary Recto na kapag ipinag-utos ng Korte Suprema ang pagsoli ng nauna nang nailipat na Php 60 bilyong pondo ng PhilHealth, hindi makakamit ng ekonomiya ang deficit targets at credit rating upgrade nito, bagay na ikinagalit ng mga petitioner.

“The bicam created the problem by allocating a considerable portion of funds to pork-ridden projects, bloating the budget with such projects, thus having to transfer important programs to unprogrammed appropriations. Tapos ngayon, kukunin ng gobyerno ang perang nakalaan para sa kalusugan ng mga mamamayang Pilipino para bayaran ang deficit na sila rin naman ang may gawa? Tapos tatakutin pa nila tayo?” saad ni former Finance Undersecretary at isang associate professor sa UP School of Economics na si Dr. Cielo Magno.

Dagdag pa ni Dr. Magno, hindi kailanman nagpapakita ng fiscal responsibility ang pagkuha ng pondo ng PhilHealth dahil lantarang paglabag ito sa Konstitusyon. At kung talagang nais ng gobyerno na magpakita ng fiscal responsibility at nababahala na hindi tumaas ang credit rating ng Pilipinas, hindi dapat ito nagsingit ng mga pork barrel project sa budget. Tinatayang nasa 20 porsyento ng national budget sa nakaraang tatlong taon ang kabilang sa nasabing proyekto.

Nananawagan ang mga petitioner sa publiko na huwag magpadala sa mapanlinlang at baluktot na argumento ng gobyerno na lumalayo sa tunay na isyu.

Ayon kay Dr. Minguita Padilla, isang doktor at isa sa mga petitioner, “with all due respect, the respondents' replies just confuse the issue. "No policy, no matter how imaginative and well-meaning, can be responsible if it violates specific laws and worse, if it violates the constitution," diin ni Padilla.