Sa isang pahayag na inilabas noong Biyernes, Pebrero 16, sinabi ng DOH na may 16,155 kaso ng ILI na iniulat mula Enero 1 at Pebrero 3 ngayong taon.

Ito ay 19% na mas mababa kumpara sa 19,935 kaso ng ILI na na-detect sa parehong buwan noong 2023.

Nakita rin ang 10% na pagbaba sa mga kaso ng ILI mula Disyembre 24 hanggang Enero 6, 2023 (8,199 kaso) at sa Enero 7 hanggang Enero 20, 2024 (7,372 kaso).

Sa kabila nito, may nakitang pagtaas ng kaso sa Ilocos Region, Calabarzon, SOCCSKSARGEN, Caraga, at BARMM sa nakaraang tatlo hanggang apat na linggo o mula Enero 7 hanggang Enero 20, 2024.

Nakita rin ang pagbaba sa dami ng Covid-19 cases.

Mula Pebrero 6 hanggang 12, 94 na bagong kaso ng Covid-19 ang average na naitatala bawat araw.

Ito ay 35% na mas mababa kumpara sa average na bilang ng mga kasong naitala sa bawat araw noong Enero 30 hanggang Pebrero 5.

Patuloy ang pagmo-monitor ng DOH sa ILI at Covid-19 at nagpapaalala sa publiko na sundin pa rin ang health protocols tulad ng paghuhugas ng kamay, pagtiyak ng tamang bentilasyon, at pagtatakip ng bibig kung uubo upang hindi na makapanghawa pa.