Mahigit 221,000 mahihirap na nakatatanda sa Rehiyon ng Bicol ang nakatanggap na ng kanilang social pension para sa 2025, ayon sa Department of Social Welfare and Development sa Bicol (DSWD-5) nitong Biyernes.

Ayon kay Joseph Teston, hepe ng Policy and Plans Division ng DSWD-5, umabot sa kabuuang PHP1.2 bilyon ang naipamahagi ng ahensya.

“Layunin ng programang ito na mapabuti ang pamumuhay ng mahihirap na nakatatanda sa pamamagitan ng pagbibigay ng tulong pinansyal para sa kanilang pang-araw-araw na pangangailangan at gastusing medikal,” aniya sa isang media forum.

Dagdag pa niya, nailipat na sa iba’t ibang lokal na pamahalaan (LGU) ang natitirang pondo para sa buong 2025, at ang mga LGU ang mamamahagi ng pensiyon kada tatlong buwan.

Batayan ng programang ito ang Social Pension Program for Indigent Senior Citizens na itinatag sa ilalim ng Republic Act No. 9994 (Expanded Senior Citizens Act of 2010) at inamyendahan ng Republic Act No. 11916.

“Kwalipikado rito ang mga senior citizen na edad 60 pataas na mahina, may sakit o kapansanan, at walang regular na kita o pensiyon. Hindi lahat ng nakatatanda ay sakop ng programa,” paliwanag ni Teston.

Samantala, para sa Ayuda sa Kapos at Kita Program (AKAP), naglaan ang DSWD ng PHP612.1 milyon para sa 96,215 benepisyaryo mula sa anim na lalawigang matinding naapektuhan ng pagtaas ng presyo ng bilihin.

Sa Walang Gutom program na layong bawasan ang kakulangan sa pagkain, 29,546 benepisyaryo ang nakatanggap ng food stamps na nagkakahalaga ng PHP284.55 milyon.

Sa programang Tara Basa! Tutoring Program, tinulungan ng DSWD-5 ang 2,005 mag-aaral sa buong rehiyon.

Para naman sa pagtugon sa sakuna, namahagi ang DSWD Bicol ng 448,667 family food packs at 783,652 non-food items na nagkakahalaga ng PHP334 milyon para sa 545,638 pamilyang naapektuhan ng iba’t ibang kalamidad.