Pinutakti na naman ang social media ng mga manlolokong gumagawa ng fake news laban kay dating Pangulong Gloria Macapagal-Arroyo na hindi pumirma sa impeachment complaint laban kay Bise Presidente Sara Duterte.

Bago ito, nagpalabas ng ‘SCAM ALERT’ ang kampo ni Arroyo upang balaan ang publiko laban sa mga fake Facebook accounts na nagpapakilalang sila ang dating pangulo.

“A fraudulent Facebook account impersonating former President Gloria Macapagal-Arroyo using her profile picture, bio and cover photo. The Former President does not have a personal Facebook account - only an Official page,” ayon sa post ni Lance Chua Suarez na public relation officer ni Arroyo.

Dagdag ni Suarez: “Any solicitations or giveaways from fake accounts should be ignored and reported.”

Nitong Miyerkules, kumalat din sa social media ang “maritess” na iniwasan ni Arroyo ang pag-endorso sa impeachment complaint na iniikot sa Mababang Kapulungan.

Ayon sa gumawa ng tsismis, dumating na umano si Arroyo sa Batasan Pambansa para sa plenary session ngunit hindi na ito bumaba ng kanyang sasakyan at umalis na lamang upang hindi mapilitang pumirma ng suporta sa pagsibak kay Duterte.

“That’s fake news that she didn’t leave her car,” sagot ni Suarez sa mga katanungan ng mga reporter.

Hindi pa nagbigay ng pahayag ang dating lider ng bansa ukol sa impeachment bid.

Kabilang si Arroyo sa 91 na kongresista na nang-dedma sa impeachment case. Kasama niya sina Reps. Eduardo “Eddie” Villanueva (CIBAC Partylist); Bryan Revilla (Agimat Partylist); Richard Gomez (4th District, Leyte); Mujiv Hataman (Basilan); Luis Campos (Makati City); Jose Alvarez (2nd District, Palawan); Marie Bernadette Escudero (1st District, Sorsogon); Rufus Rodriguez (2nd District, Cagayan de Oro City); Joey Sarte Salceda (2nd District, Albay); Rosanna Vergara (3rd District, Nueva Ecija); at Robert Raymund Estrella (ABONO Partylist).

Ilan din sa mga tumatakbong senador ang hindi pumirma sa impeachment. Sila ay sina Reps. Rodante Marcoleta (SAGIP Partylist); Erwin Tulfo (ACT-CIS Partylist), Camille Villar (Las Piñas City); Bonifacio Bosita (1-Rider Partylist); Eric Martinez (Valenzuela City) at Wilbert Lee (AGRI partylist).