Nagbabala ang Bureau of Immigration (BI) sa publiko na wag papaloko sa naglipanang fake websites na nangongolekta ng registration fees para sa e-Travel system.

Nakatanggap daw ng ulat ng BI na may mga Pilipinong nagkaproblema sa airport dahil sa pag-aakalang nakapag-register na sila sa system ng pamahalaan.

Ayon sa BI, nagbayad pa raw ang mga ito ng aabot sa P5,000 para makapagparehistro kahit na libre lang naman ang pagre-register sa totoong e-Travel system.

"We, therefore, advise the traveling public to register only in the government's official website at https://etravel.gov.ph," ani Immigration Commissioner Norman sa isang pahayag noong Miyerkules, Pebrero 14.

Hinihikayat din ng ahensya ang publiko na isuplong sa mga awtoridad ang sinumang maniningil para sa e-Travel registration.

Inilunsad noong nakaraang taon ang e-Travel system na nagsisilbing database ng mga lumilipad papunta at palabas ng bansa.

Kinakailangan ang ganitong system para mapadali sa mga awtoridad ang border control, health surveillance, at pag-monitor ng dami ng turistang pumapasok sa bansa.

Dahil maa-access ito online, hindi na kinakailangang magdala ang mga pasahero sa airport ng printed na kopya ng kanilang quarantine form at arrival at departure cards.