BATASAN, Lungsod Quezon — Nagbabala si dating justice secretary at Mamamayang Liberal (ML) party-list representative-elect Leila Norma Eulalia De Lima na kung hindi magko-convene ang Senado bilang impeachment court ay malulusaw ang tiwala ng taongbayan sa Senado bilang institusyon.

Suportado ito ng Political Science and Development Studies department ng De La Salle University na nagsabing nararapat nang simulan agad ng mga senador ang impeachment trial dahil ang pagkabalam nito'y pagyurak sa 'mekanismo ng accountability' batay sa Saligang Batas.

Ayon kay De Lima, maaaring ipagpatuloy sa susunod na Kongreso ang impeachment trial, kontra sa paniniwala ng iba na hindi puwedeng tumawid ito kung hindi magagawa sa ngayon.

“Ang prevailing view ay puwede pang tumawid kasi nga pag na simulan na, pwede pang tumawid dahi ito nga ay hindi yung ordinaryong parte ng kanilang ordinary law-making status dahil ito ay special, independent,” wika ng congresswoman-elect.

Gayun din ang opinyon ni dating Supreme Court Associate Justice Adolf Azcuna na ang mga Articles of Impeachment na natanggap ng Senado ay hindi magla-lapse o lilipas subalit maipagpapatuloy sa susunod na Kongreso.

Wika ni Azcuna, na kasama sa mga nag-akda ng Article XI ng 1987 Constitution bilang miyembro ng 1986 Constitutional Convention: “The Trial of Impeachment Cases is not a function of Legislative Power but it is a Constituent Power.”

Paliwanag pa nito: “So it does not fall under the rule that unfinished business lapses with the outgoing Congress because the Constitution says the opposite— that the trial must 'proceed' meaning it must continue until it is finished. It cannot proceed if it is made to lapse. Since it must proceed, it follows that it does not lapse.”

Kaya nga nagpaalala si De Lima na kung sakaling hindi maisagawa ngayon ang impeachment trial kay VP Duterte, magkakaroon ng “erosion of public trust” sa Senado.

"Marami pong aalma d'yan. Maraming mawawala ng respeto sa Senado bilang institusyon, which is very sad and unfortunate,” babala nito.

Pinunto ng dati ring senador na maaaring makahanap ang Senado ng mga paraan upang maipagpatuloy ang proseso ng impeachment complaint kaya walang dahilan para hindi ikonsiderang isagawa na ito sa lalong madaling panahon.