Sa survey ng Social Weather Station (SWS) na isinagawa mula Disyembre 8 hanggang 11, mas maraming respondents ang nagsabing nais nilang makatanggap ng pera sa okasyon.

Labing-anim na porsyento sa 1,200 respondents sa buong bansa ang gusto ng cash, samantalang 11% lang ang nagsabing nais nila ang pagmamahal at 10% naman ang pumili sa mga bulaklak.

Kabilang sa iba pang mga pagpipilian ay bagong damit (9%), pati na rin cellphone, relo, alahas, at isang maayos na ugnayan sa pamilya, na may 5% lang.

Napasama rin sa listahan ang pagkain at grocery (3%), tsokolate (3%), mabuting kalusugan ng pamilya (3%), motorsiklo at iba pang sasakyan (2%), at appliances (2%).

Nasa 1% lang ang nagsabing gusto nila ng pagbati, halik, anak, at date o dinner bilang regalo sa Valentine's Day.

Ayon pa sa survey, mas maraming mga babae ang nagnanais na makatanggap ng pera (19%) kumpara sa mga lalaki (12%).

Ang mga bulaklak ay naging pangalawang pinakapaboritong regalo para sa Valentine's sa mga babae, na may 13%.

Sa kabilang banda, bagong damit ang nangunang regalo para sa mga lalaki na may 14%, sinundan ng anumang regalo mula sa puso (7%).