Ipinapakansela ng Office of the Solicitor General (OSG) ang birth certificate ni suspended Bamban, Tarlac Mayor Alice Guo sa Tarlac City Regional Trial Court.

Sa nasabing petisyon, sinabi ng OSG na dapat kanselahin ang certificate of live birth (COLB) ni Guo dahil sa mga iregularidad tulad ng kawalan nito ng supporting documents na lumalabag sa requirements Philippine Statistics Authority.

Ipinunto rin ng OSG na bigo si Guo na sumunod sa mga legal na kinakailangan para sa late registration of birth.

"Alice’s COLB with Registry No. 2005-10757 must be canceled by the Honorable Court for being void, the same not having duly registered in accordance with law," sabi ng OSG sa petisyon.

Bago nito, isiniwalat ni Senador Risa Hontiveros na kinumpirma na ng National Bureau of Investigation (NBI) na iisa lamang si Guo at ang isang Chinese national na "Guo Hua Ping" matapos mag-match ang fingerprints nito.

Naungkat ang pagkatao ni Guo sa gitna ng pagkakadawit niya sa Philippine Offshore Gaming Operator (POGO) sa Bamban, Tarlac.

Mariin naman niyang itinanggi na sangkot siya sa operasyon ng mga ito, lalo na sa mga ilegal na gawain ng POGO sa kanilang lugar.